തല ഉയര്‍ത്തിപ്പിടിച്ചു നടക്കേണ്ട  ഇന്നത്തെ യുവതലമുറയെ തലതാഴ്ത്തി നിര്‍ത്തുന്ന സമൂഹമാധ്യമങ്ങളെ നാം കണ്ടില്ലെന്ന്  നടിക്കരുത്. പള്ളിയില്‍ തലതാഴ്ത്തിനില്‍ക്കുന്ന    എട്ടും പത്തും  വയസുള്ള  കുട്ടികളെ കാണുമ്പോള്‍ സന്തോഷമാണ്. എന്നാല്‍ അവര്‍ വായിക്കുന്നത് ബൈബിള്‍ അല്ല മറിച്ച്, മൊബൈല്‍ ഫോണിലെ കമന്‍റുകളാണെന്നറിയുമ്പോള്‍ തിരിച്ചറിയാം നമ്മുടെ മേല്‍ സാമൂഹ്യമാധ്യമങ്ങള്‍ക്കുള്ള അധിനിവേശം.  പ്രാര്‍ത്ഥിക്കാന്‍ പോലും, ജീവിതം ദാനമായിത്തന്ന ദൈവത്തിന് നന്ദി പറയാന്‍ പോലും സമയമില്ലാതായിരിക്കുന്നു എന്നറിയുമ്പോള്‍ മനസിലാക്കുന്നു നമ്മള്‍ നമ്മുടെ സംസ്കാരത്തെ നമ്മുടെ പൈതൃകത്തെ മറന്നുകൊണ്ടിരിക്കുന്നു എന്ന്.

ഒരു കാലത്തു വായനാശീലവും, കളിയും, കഥപറച്ചിലും ഒരുമിച്ചു ഒരു മേശക്ക് ചുറ്റുമിരുന്ന് ഭക്ഷണം പങ്കുവയ്ക്കുമ്പോളും എല്ലാവരുടെയും ഉള്ളില്‍ ഒരു ബന്ധമുണ്ടായിരുന്നു മങ്ങിപ്പോകാത്ത മാഞ്ഞുപോകാത്ത കളങ്കമില്ലാത്ത സ്നേഹം. ഇന്ന് സ്വന്തം മക്കളുടെ അടുത്ത കൂട്ടുകാരെയോ അവരെ പഠിപ്പിക്കുന്ന ടീച്ചറെയോ പലര്‍ക്കും അറിയില്ല. മക്കളുടെ കഴിവുകളെ അംഗീകരിച്ച്  അവരുടെ കുറവുകളെ മാറ്റി അവരെ നല്ലവരാക്കാന്‍ ആര്‍ക്കാണ് നേരം.