വില്‍ഫ്രഡ് അച്ചന് പറയാന്‍ ഏറെയുണ്ടായിരുന്നു. പറഞ്ഞതെല്ലാം സുന്ദരവും ആയിരുന്നു. അതുകൊണ്ടാകണം അദ്ദേഹത്തിന്‍റെ ശിഷ്യന്മാരെല്ലാം ഏറ്റവും നല്ല അധ്യാപകരില്‍ ഒരാളായി അച്ചനെ അടയാളപ്പെടുത്തുന്നത്. അച്ചന്‍ ലത്തീനും ഇംഗ്ലീഷും പഠിപ്പിച്ചിരുന്നപ്പോള്‍ കുട്ടികള്‍ അതിവേഗം ഭാഷയില്‍   പ്രാവീണ്യം നേടിയിരുന്നുവെന്ന് മാത്യു പരിന്തിരിയച്ചന്‍ ഓര്‍ക്കുന്നു. നല്ലൊരധ്യാപകനായത് മികവുറ്റ അധ്യാപന ശൈലി കൊണ്ടു മാത്രമല്ല, കുട്ടികള്‍ക്കു കൊടുത്തിരുന്ന ആദരവു കൊണ്ടു കൂടിയാണ്. ഏതു നല്ല കാര്യത്തിനും ഉണ്ടായിരുന്നു അച്ചന്‍റെ വക ഒരു സമ്മാനം. 

ഇങ്ങനെയായിരുന്നു നമ്മുടെ വില്‍ഫ്രഡ് അച്ചന്‍. നിറയെ കഥകളും ചിരിയുമായി, ആരോടും പരാതിയില്ലാതെ, ആരേയും മുറിപ്പെടുത്താതെ, മുറിവേല്‍പ്പിച്ചവരില്‍ നിന്നും ദൂരേയ്ക്ക് തെന്നി മാറി, താമസിച്ച സ്ഥലത്തോടോ, പണത്തോടോ അമിതമായ മമത പുലര്‍ത്താതെ, ചെയ്ത കാര്യങ്ങളില്‍ നൂറുശതമാനം ആത്മാര്‍ത്ഥതയും സത്യസന്ധതയും പുലര്‍ത്തി ഒരിളം കാറ്റുപോലെ കടന്നുപോയി ഈ ജീവിതം. തന്‍റെ യാത്രയും ദൗത്യവും പൂര്‍ത്തിയാക്കി അച്ചന്‍ ദൈവത്തിന്‍റെ വീട്ടിലേക്കു മടങ്ങിയിരിക്കുകയാണ്. മനുഷ്യസ്നേഹി എന്നു വിളിക്കുന്ന തിയോഫിനച്ചനിലെ വിശുദ്ധനെ തിരിച്ചറിഞ്ഞ്, അദ്ദേഹത്തിന്‍റെ നാമകരണത്തിനു തുടക്കം കുറിച്ചത് വില്‍ഫ്രഡ് അച്ചനാണ്. അപരനിലെ വിശുദ്ധി കാണുന്നവരുടെ കണ്ണുകള്‍ ക്രിസ്തുവിന്‍റെതിനു സമാനമായിരിക്കണം. ക്രിസ്തുവിനെ പോലെ നോക്കി, അവനെപ്പോലെ കഥയും കാര്യവും പറഞ്ഞ്, അവന്‍റെ ചുവടുകളില്‍ പദമൂന്നി, സുവിശേഷകനായി മാറിയ ഞങ്ങളുടെ സഹോദരന്‍ വില്‍ഫ്രഡച്ചാ, അങ്ങേയ്ക്കു ഞങ്ങളുടെ പ്രണാമം. അങ്ങയെ ഓര്‍ത്ത് അഭിമാനമുണ്ട് ഞങ്ങള്‍ക്ക്. അങ്ങയുടെ ഓര്‍മ്മകള്‍ ഞങ്ങളുടെ ജീവിതങ്ങളെ ദീപ്തമാക്കട്ടെ. അങ്ങേയ്ക്കു നാഥന്‍റെ നെഞ്ചില്‍ ഒരിടം ആശംസിക്കുന്നു, പ്രാര്‍ത്ഥിക്കുന്നു.