ഒരു കാര്യം ചെയ്യുമ്പോള്‍ അതിന്‍റെ പ്രതിഫലനങ്ങള്‍ അപ്പപ്പോള്‍ അല്ല, പത്തോ ഇരുപതോ വര്‍ഷങ്ങള്‍ക്കു ശേഷം അന്നത്തെ കുട്ടികള്‍ ഓരോ സ്ഥാനങ്ങളില്‍ എത്തിക്കഴിയുമ്പോഴാണ് മനസ്സിലാവുക എന്നത് ഒരു ഹൈപ്പോത്തീസിസ് മാത്രം ആയിരുന്നു. അന്ന് അത്തരം പ്രവര്‍ത്തനങ്ങളില്‍ ഏര്‍പ്പെട്ടതുകൊണ്ടാണ് ഇന്ന് പരിസ്ഥിതി എന്ന വിഷയം പൊതുബോധമണ്ഡലത്തിലേക്ക് ഒരു സംസാരവിഷയമായിട്ടെങ്കിലും എത്തിക്കാനായത.്  നാം ഈ ചെയ്യുന്നത് ഒന്നും പോരാ എന്ന വിചാരത്തോടെ, തിരിച്ചറിവോടെ തന്നെ നമുക്കീ വിഷയങ്ങള്‍ മനസ്സിലാക്കാം.

എല്ലാ കാലത്തും ഇത്തരം കുറച്ചു കുഞ്ഞുങ്ങള്‍ ഞങ്ങള്‍ മുതിര്‍ന്നവര്‍ക്ക് ഭൂമിയേയും അതിലെ ജീവനേയും കുറിച്ചുണ്ടായിരുന്ന ആകുലതകളെ നന്നായി മനസ്സിലാക്കിയിരുന്നതായി കാണാം. എന്നാല്‍ 2000-മാണ്ടോടെ കുഞ്ഞുങ്ങള്‍ മുതിര്‍ന്നവരെ പോലെ, 'എന്താണ് ഈ കാടും കാട്ടറിവുകളും നദിയും ജീവനും പിന്നെ വികസന സങ്കല്പങ്ങളും പറഞ്ഞു നടക്കുന്നതു കൊണ്ടു നിങ്ങള്‍ക്കുള്ള പ്രയോജനം' എന്നു ചോദിച്ചു തുടങ്ങിയപ്പോള്‍ ഒന്നു ബ്രേക്കിടാൻ സമയമായി എന്നു തോന്നി. പിന്നെ ഞങ്ങളുടെ ക്ലാസ്സുകള്‍, വളരെ സ്നേഹത്തോടെയും ഉറപ്പോടെയും വിളിക്കുന്ന സ്ഥലങ്ങളില്‍ മാത്രമാക്കി.

മണ്ണ് തൊടാനും മരം കയറാനും വെള്ളത്തില്‍ നനയാനും അനുവദിക്കാതെ നമ്മളിവരെ എവിടേക്കാണ് കൂട്ടികൊണ്ടു പോകാന്‍ നോക്കുന്നത്. പ്രകൃതിയെ അറിയാതെ വളരുന്ന കുട്ടികളില്‍ വളര്‍ന്നു വരുന്ന നേച്ചര്‍ ഡെഫിസ്റ്റ് സിന്‍ഡ്രോമിനെ കുറിച്ച് ഇന്നു നമുക്കറിയാം. മണ്ണില്‍ കളിച്ചും മഴ നനഞ്ഞും വെയില്‍ കൊണ്ടും വളരുന്ന കുട്ടികള്‍ക്കേ രോഗപ്രതിരോധ ശേഷി കൈവരുന്നുള്ളൂ എന്ന കാര്യം ഡോക്ടര്‍മാര്‍ പറഞ്ഞു തുടങ്ങിയിരിക്കുന്നു. സഹകരണത്തിന്‍റേയും സഹവര്‍ത്തിത്വത്തിന്‍റേയും പാഠങ്ങള്‍ പഠിക്കുന്നതും ഇവിടുന്നു തന്നെ. റഷ്യയിലും യൂറോപ്പ്യന്‍ രാജ്യങ്ങളിലും മഞ്ഞുകാലത്ത് കുട്ടികളെ ഇറക്കി മഞ്ഞില്‍ കളിപ്പിക്കുക പാഠ്യപദ്ധതിയുടെ ഭാഗമായി കഴിഞ്ഞു. അങ്ങനെ വളര്‍ന്ന ഒരു കുട്ടിയെ പരിചയപ്പെട്ട കഥ ഇനിയും എനിക്കു മറക്കാനായിട്ടില്ല.   

പത്തു കിണറുകള്‍ക്കു സമം ഒരു കുളം

പത്തു കുളങ്ങള്‍ക്കു തുല്യം ഒരു പുഴ

പത്തു പുഴകള്‍ക്കു തുല്യം ഒരു പുത്രന്‍

പത്തു പുത്രന്മാര്‍ക്കു തുല്യം ഒരു മരം 

റസ്സലിന്‍റെ കഥ ഞാന്‍ നിങ്ങളോടു പങ്കുവച്ചത് ഒരു കുട്ടിയെ പൊക്കി പറയാനല്ല.  ഞാനൊരു പക്ഷേ ആ കുട്ടിയെ ഒരിക്കലും കണ്ടുമുട്ടിയില്ലെന്നും വരാം. പണ്ട് നാം പറയും ഒരു കുട്ടിയുടെ മനസ്സ് ഒരു സ്ലേറ്റു പോലെയാണ്, അതിലെന്താണ് നാം എഴുതുന്നത് അതാണ് അവന്‍ എന്ന്. പിന്നെ നാം അതൊരു എഴുതാത്ത പുസ്തകമാണെന്നു തിരുത്തി. ഒരുപാട് മാറിപ്പോയ ഈ കാലഘട്ടത്തില്‍ നമുക്കറിയാം അതൊരു പുതിയ കമ്പ്യൂട്ടര്‍ പോലെയാണെന്ന്. അതിലേക്കു ഫീഡ് ചെയ്യുന്ന കാര്യങ്ങളേ ആ കമ്പ്യൂട്ടര്‍ തിരിച്ചു തരൂ. വൈറസു കയറാനുള്ള സാഹചര്യങ്ങള്‍ എല്ലാം ഒരുക്കിവച്ച ശേഷം അതു നന്നായി പ്രവര്‍ത്തിച്ചോളും എന്ന് ആശിക്കാന്‍ മാത്രമേ നമുക്കാവൂ. മുതിര്‍ന്നവരായ നാം ഈ കാര്യം ഓര്‍മ്മയില്‍ വയ്ക്കുന്നത് നന്നാണ്. 

• Tags
• #കവര്‍സ്റ്റോറി - സത്യത്തില്‍ കുട്ടികള്‍ക്കെന്തെങ്കിലും കഴിയുമോ
• # വീണ മരുതൂര്‍